黃牛是在香港鄉郊常見的物種，對於從未見過牛隻或少到鄉郊的城市人，在鄉郊遇見牛牛或許會覺得新奇、或許會覺得害怕，這次就讓居住在谷埔、鳳坑及鹿頸村的牛牛們為大家釋除疑慮，讓大家知道來到鄉郊如何可以人牛共處。
谷埔牛
我們老祖先二三百年前就被帶到這裡協助老細們開田耕種，可以話係地道原居民！聽講太太爺爺嘅時候開始越來越少工開（60至70年代農業式微），個個唔知去晒邊。而留低的老細們不忍心賣我哋去屠場，就炒哂我哋，任我哋喺谷埔自由自在咁生活。
依家日日鮮草放題，真係牛生一樂也，mou～所以 千祈唔好餵人類食物俾我哋食，包括生果同蔬菜，我哋有鮮草食就夠哂！麻煩諗下，我哋食慣咗人類食物，第時聞到同一種氣味就會問經過啲人類攞（鬼認得你哋邊個打邊個），到最後越嚟越依賴人類……聽講塔門嗰邊啲同鄉連習性都改埋，成日問人攞野食，有時連膠袋吞落肚，搞到個胃塞晒，最後消化唔到就餓死……
（圖為於三肚牧草之公牛，肚異常脹大疑似是「垃圾肚」）
每朝我哋全牛族都會去海邊牧草，食過早餐就chill住曬日光浴。呢個位置正係入村必經之路，而我地唔會去分邊度係行人路，有時會阻阻大家， 請稍安無躁。同埋我地習性係邊行邊食邊解放，會唔覺意喺行人路上大解放，形成密密麻麻牛屎陣，再次請大家多多包容！
上次曬日光浴時聽到有一位山客在經過牛屎陣時，明白到我們係原居民，而佢哋只係過客，真係十分感激佢哋嘅體諒同尊重。
鳳坑牛
我係鳳坑最後一隻牛。每當我喺村外沿岸的路牧草時，好多山客都會上前同我合照，簡直係鳳坑嘅生招牌。不過影相還影相，請唔好行太近，亦唔好摸我（有寄生蟲㗎！），保持兩三米距離就最好。而拍照時都唔好用閃光燈，因閃燈會令我受驚，一驚慌就會亂踢亂撞，撞到大家就唔好啦。
（圖為錯誤示範！影相還影相，唔好行太近。）
有時我會企正在路中心，由於岸邊小路淺窄，或許會阻擋你去路，雖然我大大份，但我很溫柔，遇見我時請唔好害怕、不使大叫，因為我哋對聲音十分敏感，太大聲亦會令我哋受驚，其實我哋真係好膽小。
鹿頸牛
我哋係鹿頸剩返嘅兩隻牛，廿年前我哋家族有成二十幾隻㗎，不過陸陸續續被絕育，加上牛壽已盡（12-18年左右），依家已經剩返我哋兩兄弟相依為命……如果有日我哋都歸西，鹿頸牛就絕種啦！
小巴站呢邊人比較多，相對亦多人亂扔垃圾。其實人類攞左咩嚟就應該自己攞返走啦。明明郊區設施/人手都少過市區，個個貪方便，隨手就扔，搞到我地屋企污糟晒。唔通人類成日都會喺屋企亂扔垃圾？真係諗唔明。
遇見受傷牛牛可以怎麼辦？
在鄉郊遇見黃牛的機率較高，因牠們是這裡的原居民，村裡正是牠們的棲息地。那天共創團隊入鹿頸村後離開之際，遇見了兩隻鹿頸最後的公牛，但其中一隻牛的一隻角正在流血中。
遇見受傷牛牛，一般做法首先是拍低傷牛的正面，必須有牛角形狀及耳牌號碼（如有） 、發現傷牛地點（如車站、最近燈柱上的號碼）及時間，並致電1823或電郵通知漁護署從促派獸醫去跟進及治療，提供以上資料。由於1823只限非緊急服務，未必能即時回應作出行動，漁護署轄下的牛隊只於星期一至五出勤，而求助案子都是根據緊急狀況而排列。
現在網上資訊流通，不妨向坊間對牛隻有相對認識的護牛團體或有資深經驗的獨立義工尋找即時求助。在臉書上有數個由不同義工管理的牛群谷，可在谷裡出帖報告有關之傷牛及提供以上提及的傷牛相片及資料。有時傷口未必很嚴重並非需要出動到獸醫，而受過訓練的義工可即時作出跟進。
如發現牛牛「嚴重受傷」或有任何人對牠踢、打等行為，請即時報警，報告有動物被殘酷對待，此同樣可應用於其他動物上。
根據第169章《防止殘酷對待動物條例》有關殘酷對待動物的有關罰則：(1) 任何人 ——
(a) 如殘酷地打、踢、惡待、過度策騎、過度驅趕任何動物或殘酷地使任何動物負荷過重或殘酷地將其折磨、激怒或驚嚇，或導致或促致任何動物被如此使用，或身為任何動物的擁有人而准許動物被如此使用，或因胡亂或不合理地作出或不作出某種作為而導致任何動物受到任何不必要的痛苦，或身為任何動物的擁有人而准許如此導致該動物受到任何不必要的痛苦。一經循簡易程序定罪，可處罰款$200,000及監禁3年。
傷牛跟進：當日即時向資深經驗的義工求助，在一星期左右後已被漁護署成功接往農場療傷，收到消息是醫好後便隨即放回。可是筆者每星期到鹿頸及鳳坑只見到另一隻鹿頸牛跟鳳坑牛在一起，希望漁護署是遵守承諾將已康復的牛隻原區放回吧。
香港牛物種保育
香港牛物種保育協會 網上報案方法 81036312 啟動拯救程序
總結
- 不要餵人類食物，請收起所有食物，將膠袋及垃圾袋放入背囊。
- 切勿觸摸牛牛，宜保持一定距離。更加切勿觸摸牛BB，因為一但牛BB沾上人類氣味，牛媽媽就有可能不能以氣味去認出牛BB，從而不再照顧及餵奶。
- 切勿追逐、或打擾它們，並應避免尖叫，要保持安靜；看到牛的糞便請不要大驚小怪。
- 自己垃圾自己帶走，用膠袋裝著的垃圾都要收起，避免牛牛誤當成食物。
- 切勿曝露牛BB的位置，為免不懷好意之士會前來傷害牛BB。