請 選 擇:

Offering a wide range of local farm produces from rice, […]






無論你係從馬料水定係沙頭角搭街渡入荔枝窩,落咗船後轉左就可以直入村廣場。
廣場左邊係小瀛故事館,歡迎入內參觀。右邊係協天宮同小瀛學校。幸運嘅話星期六日有時會見到回流嘅村民英仔姐喺度賣汽水、茶粿, 都係一朝早就起身蒸架!一路向前行經過涼亭, 你會見到寫住紫氣東來嘅東門, 每個月既第一個星期六,荔枝窩會有農墟,復耕嘅社區農友都會喺度擺賣農產品同手作仔。
入咗東門向左望就係華懋故事館、二伯士多同Foo’s cafe。
二伯士多有豆腐花、公仔麵同汽水補給。
隔離高咗一級係Foo’s cafe ,Anna 搜羅唔少本地食材,製作時令特飲同輕食。你仲有機會飲到荔枝窩咖啡同買手信, 例如隨意農樂有親手種同製作嘅香草護膚品,隱山有花茶有曲奇有時仲有文創產品, 永續實驗農場嘅各式天然醬料,自然管理協議嘅生態友善米等等。
入咗東門沿住巷直行,故事館後面再後面, 就係好出名嘅花花雪條喇!呢度叫「自然空間」,仲有唔少自家種自家製嘅健康食品!天氣好嘅時候, 你仲有機會見到幾隻荔狗懶洋洋喺度曬太陽,靜靜地經過唔打擾佢哋就ok喇。
想食客家菜?行前兩步啦,向左行到盡頭,見到啲戶外枱櫈就係明記茶座,我想推介春哥嘅黃酒雞同雞粥, 之前仲試過喺到打工換宿添~隔籬有個花園仔可以坐低抖下。而右邊嘅最盡頭係『的記』, 都係一班人點菜食飯嘅好地方,的哥唔係日日開,想試招牌炆豬肉最好打電話預訂咗先啦。
行到攰又食到滯,去到最後一排屋嘅右邊,花園仔隔離有間小cafe叫荔林咖啡,樓上供應自家farm to table 嘅飲品同蛋糕,環境舒適。而去到左邊最入近長秀門花園仔對面,你會見到住咗一家3口, 推廣自然為本、綠色生活嘅綠續友倈, 唔止門口有得免費斟水,仲有自家製純素雪糕、洛神花刨冰等。
如果你有一大班朋友入嚟荔枝窩,不妨打電話同群英姐預約,等英記茶室為大家度身訂造一餐鄉村住家菜!
最後最後,如果覺得一日食唔曬所有美食?不妨book 定客家生活體驗村(相關故事),留低過夜啦!


吉澳係沙頭角附近嘅島嶼,以前係往來深圳鹽田同埋新界東北村落嘅中途站,住咗唔少客家人同漁民。今日吉澳最熱鬧嘅地方就係吉澳公眾碼頭,一落船就會見到一棵大榕樹, 呢度位於吉澳大街嘅中間,係資訊集中地,隔離有洗手間,亦係兩條吉澳文化徑嘅起點:左邊係漁民村、再行上去就係高地頂觀景台,比較寧靜;而右邊既景點就比較集中,沿途會見到地質公園嘅解說牌,只要scan牌上嘅QR code,你就可以聽到以前嘅故事啦!
吉澳嘅食肆亦集中喺呢條大街,落船首先見到「兄弟士多」,由近年回流嘅村民開嘅,係一個坐得舒服嘅食物補給站,同時亦係村民嘅聚腳點。
而向右行多兩步就係大名鼎鼎屹立咗幾十年嘅益民酒家,有招牌手打墨魚丸,仲有蒸銀魚仔都好開胃㗎! (如果一大班人去食,打電話預約咗就唔洗等位啦!)繼續向前行,仲有唔同村民出品嘅茶粿、糯米糍、砵仔糕、乾貨海味等等都可以買返屋企做手信,風味一流㗎~
一路向右沿吉澳大街行到盡頭,你會經過天后宮,同六角古井。吉澳天后宮係三級歷史建築,不妨欣賞佢嘅石灣陶瓷、門神,以及門口嘅《奉禁加租碑》,廟內仲有乾隆年代鑄造嘅銅鐘。每年農曆3月23日, 村民會返嚟慶祝天后誕, 有天后巡遊、麒麟隊等等,場面盛大,全賴一班村民傳承。天后宮旁邊,有個吉澳故事館,內容豐富,不妨同導賞員傾下計,分分鐘係吉澳村民嚟㗎!如果仲有腳骨力, 可以再行前睇睇三百年歷史嘅六角古井,每十年一度安龍太平清醮,村民會喺度取「龍水」、埋入地底,祈求龍脈不衰、風調雨順。
鍾意睇風景嘅你,可以預留定多一個鐘,去天后宮後面嘅登山小徑,行上去高棚頂。喺高棚頂觀景台同山海亭望落黎,你會見到成個吉澳同印洲塘! 吉澳可以從馬料水、大水坑、或沙頭角搭街渡來往,不過班次日日唔同, 記得預先check 清楚船期喇, 喺度祝大家有個愉快嘅旅程!