【節錄內容】

🗨️: 今日好高興邀請到Charles 同阿史, 兩位除咗都係喺外面搬入嚟沙頭角嘅居民之外，佢哋亦係沙頭角文化生態協會嘅成員。而家喺沙頭角、印洲塘一帶做緊好多鄉郊復育嘅項目。Charles 我知道你一直鍾意行山，其實最初係點樣同沙頭角、印洲塘呢一帶結緣嘅呢？

🎤Charles: 之前其實都唔熟悉沙頭角嘅，不過2001年嘅時候梅子林村長曾玉安邀請我參加荔枝窩嘅太平清醮，嗰陣時我認識咗荔枝窩，驚為天人! 跟住就鍾意咗呢個地方喇。印洲塘俾人一個好平靜、好溫柔、好似少女，令你覺得呢個地方，既有文化，又有優美嘅風景。其實來過嘅人，特別係鐘意大自然嘅人會覺得呢啲地方好寧靜、好悠閒嘅感覺。

🗨️: 咁我又想問吓阿史，我知道你對鄉村、村校的音樂一直都好有興趣，係咪因為咁先令到你搬到嚟沙頭角住呢？

🎤阿史: 我係好鍾意香港嘅村落嘅，因為我覺得入面有好多我哋一路都好少機會可以接觸到，但係其實好珍貴嘅文化歷史，同埋一啲生活智慧。尤其係佢承載著好多一啲好簡單但係其實我哋都市人好需要嘅一啲，生活經驗啊! 咁所以我一路都好希望可以將呢一類記憶，呢啲生活嘅小智慧等，慢慢去帶返出嚟。我搬入嚟沙頭角一來係因為呢個地方本身係一個好舒適嘅小社區啦，另外好好彩有機緣可以加入到沙頭角文化生態協會。

🗨️:你喺度策劃咗好多唔同嘅項目，有冇邊一個作品係特別深刻？

🎤阿史:我諗唔係一個囉，而係呢度嘅人，佢哋每個人有嘅才能同埋才華。我哋喺呢度做所有嘢，其實都係因為有呢度嘅人，先可以發生到。

🗨️: 兩位都提過喜歡呢帶嘅寧靜，依家入咗嚟住都有一段時間啦，加上沙頭角最近開放，有無觀察到其實呢種寧靜有無改變呢？

🎤Charles:啱啱搬來嘅時候，其實係好享受嗰種寧靜嘅。但係慢慢發覺太過「單一」，同埋有時會覺得個社區唔係咁「完整」，可能因為你淨係見來見去都係嗰班人，例如你知道有好多老人家其實住喺屋入面，但係唔落街嘅;朝頭早似乎有啲人氣，但係呢，其實佢哋淨係出去坐車走(返工)呀咁樣。咁所以個環境嘅寧靜呢，唔係講緊話大家真係享受緊呢個地方嘅寧靜，而係都係因為「剩低」咗、留返落嚟嘅人咁樣。咁所以我覺得呢種寧靜好似唔係太健康，雖然我鍾意靜，但唔係「蕭條」嘅感覺，所以我想沙頭角，希望佢活潑返啲，或者係有一啲衝擊？

🗨️: 可唔可以補充少少一啲生活嘅細節，畀大家感受吓沙頭角生活嘅「寧靜」，或者Charles 指嘅「蕭條」係點嘅呢?

🎤阿史: 自己就覺得好ok嘅，因為我呢10年都係住喺啲比較偏遠嘅地方，有啲可能係比沙頭角更加寧靜，更加蕭條。對我來講，由以前嘅嗰啲村，沙頭角我反而覺得我返番去城! 因為沙頭角其實係有晒你生活所需，有超市有郵局有所有嘢。

🗨️: 咦? 阿史有另一個角度喎

🎤Charles: 係，我自己就覺得有時好似都幾浪費資源。例如我去到圖書館，可能永遠都係小貓兩、三隻，職員多過喺度睇書嘅人。但係當然啦，如果你鍾意嘅話，其實好適合，你去到遊樂場、球場、社區中心其實都冇乜人用，就算係餐廳，來去嗰幾間賣緊差唔多款嘅食物，即係大家都冇乜變化，咁所以住耐咗之後呢，就會覺得，嗯，都想試下外邊啲嘢喎...因為我住咗12年啦! 呢12年個變化唔係咁多嘅時候呢，就希望佢有啲新嘢，熱鬧啲啦，有啲活力咁可以吸啲外邊嘅人嚟，或者啲年青人返吓嚟啦，咁佢哋就可以做返啲小生意，令到呢度多啲生氣，無論係食啦，或者係玩啦，或者文化，即係個圈子闊啲，咁其實令生活質素都可以提升！

🎤阿史: 好唔同，Charles真係住咗12年啦，12年都冇咩變化，而我啱啱搬入嚟住，已經係啱啱開放咗之後，某程度上我已經係享受緊而家改變中嘅沙頭角吖嘛! (Charles: 係, 環境靚咗乾淨咗!) 我覺得喺呢度好好坐，好舒適，特別係夜晚。可能好多遊人比較少日落之後仲留喺沙頭角啦，呢個我都希望之後睇下有無機會可以令到啲人可以感受到夜晚，即係沙頭角嘅另一個面貌: 原來夜晚喺避風塘，碼頭嗰度去行下，睇吓啲漁船仔，真係好悠閒㗎。

🗨️: 係咪都係因為咁，所以嗰種想展示沙頭角嘅另一面，想更多年輕人返嚟嘅心，令到你哋決定佢開始王昌泰盒子呢一個空間?

🎤阿史: 其實成個最初嘅諗法都係來自Charles，因為Charles 喺新樓街一路喺呢度，成立咗沙頭角故事館，其實都係Charles話畀我聽，呢條街裡面收埋咗好多好有歷史價值嘅故仔，因為已經係一棟90年嘅屋喇！咁所以嗰時候我哋就開始著眼去諗，即係沙頭角新樓街呢度，其實可以發生啲乜嘢嘢呢？

對於我來講，我覺得重要嘅係入面嘅人，當佢哋願意分享嘅時候，其實每一個故事都有佢嘅價值感。適逢禁區就快開放，咁我哋都會去諗，其實我哋喺沙頭角工作嘅時候，我哋想將呢度啲乜嘢嘢帶到出去，畀人哋去知呢？我哋嗰個唔係責任嚟嘅，可能係我哋自己嘅興趣，其實係想做啲乜嘢嘢呢啲？見到好多工程喺度，翻新後究竟沙頭角啲人入到嚟，想睇嘅係乜嘢嘢呢？係睇呢一啲新嘅旅遊景點，定係其實大家會期待去睇一啲被遺忘嘅歷史？或者係因為禁區而入唔到嚟睇嘅一啲舊嘅東西？我諗其實故事館某程度上都係呢一個宗旨，即都係希望將沙頭角嘅故事去用一啲物件、故事嘅方式去畀人哋去閱讀到！

咁而王昌泰盒子有另一個我覺得都好重要嘅主旨，就係去聚返沙頭角同埋印洲塘嘅人！因為其實新樓街以前都係一個聚腳點，即係一個好繁盛嘅墟市。所有人，即係所有陸上面嘅村民啦，附近村落嘅人，水上面嘅漁民，其實都會嚟呢度趁墟...王昌泰佢本身係一個穀米舖，喺六七十年前嘅數簿裏面，會見到晒以前附近村落嘅名......

🗨️: 我好奇最開始係點樣同到王昌泰嘅老細去傾到做呢個咁有趣嘅空間呢？

🎤Charles: 王昌泰嘅後人Steve有一次佢返嚟帶我上去參觀，嘩發覺原來呢間鋪冰封咗十幾廿年......入面擺嘅嘢同五六十年前呢，其實都係冇分別嘅......咁所以我覺得，嘩呢度全部都係寶嚟嘅...…

想知道關於王昌泰盒子嘅更多趣事，同埋嘉賓們沙頭角未來嘅對期望? 就要聽晒 第七集 #鄉村是| 鄉村事 五分鐘講鄉村故事！

【節錄內容】

🗨️曉文，可唔可以介紹吓，喺荔枝窩一年四季可以留意啲咩生態?

🎤我自己留意生態都留意咗十幾年啦，荔枝窩嘅生態四季都有好多嘢睇。例如春天會有過境季候鳥經過荔枝窩，所以朝頭早起身呢，咁就會睇到好多雀仔啦。春天亦都係有個霧景，正因為其實春天好潮濕，海邊嘅地方，當佢濃霧一片嘅時候，其實亦都係有一番美景！ 咁如果夏天呢就更加熱鬧，因為尤其係夜晚嘅時候喺池塘，即係稻米田嘅旁邊呢，都會有好多青蛙喺度叫。 秋天嘅話呢，好多農田，即係農夫都開始收成啦。譬如我哋田嘅話就種咗好多洛神花，如果經過淨係我哋田都可以睇吓洛神花嘅花海！ 另外冬天呢，有時夜晚會有一啲小型哺乳類動物，即係野豬、箭豬、同埋黃牛都會喺荔枝窩村行來行去出沒。

🗨️有冇話邊啲地方會睇到呢？例如村入面有條自然步道，橋同埋空心樹? 即係風水林嗰邊?定係其他地方都有？

🎤有兩個地方係都ok 嘅，譬如夜晚嘅時候呢，我哋就會行下風水林啦。風水林有時都會有啲哺乳類動物出沒啦。咁至於呢青蛙啦，就會喺一啲濕地、農田呀嘅地方好容易就可以搵到嘅。( 可能就係西門過去田嗰面 ) (係)

🗨️咁你自己最鍾意荔枝窩嘅邊個位置呢？

🎤其實那好多位置都覺得好靚呀！而自己逗留得最長時間，當然係自己嘅田啦！因為成日朝早都會有兩三個鐘頭喺自己個田度工作，咁我亦都會留意自己嘅田究竟有咩變化。另外我都好鍾意碼頭個位置，因為尤其是初一十五潮退嘅時候啲海水退得好出啦，跟住嗰個泥灘就露晒出嚟，即係你行落嗰個泥灘，石灘嗰度呢，就會feel到好似置身於喺另一個地方咁樣。 真係感受到，即係個大自然好大，自己又真係一丁友好渺小嗰個感覺......

🗨️呢個係咪都係吸引你來到荔枝窩嘅原因?

🎤係嘅，因為喺城市嗰度，可能真係好繁忙，路好擠迫，每個人嘅居住空間都好細。嚟到荔枝窩呢個淨係環境同埋嗰個空間感呢，係兩回事嚟嘅......我都好鍾意呢一種好寧靜，同埋真係成日可以喺大自然好親近嘅感覺。

想知道曉文住喺荔枝窩之後有咩轉變同未來計劃, 仲有總結3年偏遠鄉郊生活故事同務農經驗嘅新書，就要聽晒 第六集 #鄉村是| 鄉村事 五分鐘講鄉村故事！

【節錄內容】

🗨️Foo’s Cafe 係點樣誕生㗎?

🎤最直接係因為我係返嚟復耕嘅第一批農夫，而本身我係荔枝窩外嫁女個女，我嘅祖家喺度，細個阿公阿婆湊我，基本上我嘅童年都係喺呢度玩大。 所以一知道咁多人畀咁多資源去活化荔枝窩，我就覺得義不容辭，率先成為第一批復耕農夫，拉攏咗幾個客家同伴女士，成立隨意農樂，嗰陣時其實一齊都種咗4年。不過呢度你要可持續發展嘅話呢，首先要有個concept：復耕係活化荔枝窩村不可或缺嘅一環。 要多啲公眾人士知道，因為遊人多數係週末假期嚟，但係假期啲農夫唔喺到，所以既然我祖家有一個咁有利嘅位置（第一排屋），就覺得why not我唔喺祖家門口去推廣我哋荔枝窩在地嘅農產品呢？ 就係咁樣誕生咗Foo’s Cafe囉～

🗨️荔枝窩嘅農產品對你嚟講有咩意義？

🎤因為本身我有參與嘅復耕，覺得真係血汗嚟嘅，真係粒粒嘅皆辛苦，要好好珍惜。我成日講自己係hybrid嚟嘅，著眼點就係點樣令到更加廣大嘅公眾認識荔枝窩，同埋了解復耕嘅重要性。我覺得每樣嘢都可以有故仔講，故仔其實係一個媒介／Channel俾公眾去認識我哋多啲，咁當然另一個就係為農夫增加收入啦。

對我哋屋企人嚟講呢，我媽直情係我定期每兩個禮拜都送啲菜返去畀佢添，好多村民譬如食得返荔枝窩米，我諗佢哋又係另一種深刻啲嘅感受。因為我好細個阿婆湊嘅時候，佢哋周山遍地都係米田嚟嘅，我婆婆孭住我落田種米，咁我跟住中間經歷過荒廢，依家有復耕，又有返米出嚟，嗰種失而復得同埋重現生機嘅象徵意義，對原居民嚟講都係深刻嘅。

🗨️見到除咗米外，你仲有賣其他農產品，最近有啲咩呢？

🎤我諗而家最熱門，好多公眾人士即刻跑嚟想要試嘅就係荔枝窩種植嘅咖啡！其次我會覺得係一系列荔枝窩環境管理協議嘅嘅農產品。因為我哋嘅淡水濕地曾經被評為係香港頭三位最重要嘅淡水濕地，生物多樣性、保育同耕作相輔相成。

🗨️你希望第一次嚟嘅人入到嚟，會留意到啲乜嘢？ 

🎤其實唔係一樣嘢，係整體嘅！其實香港都缺乏嘅，對於保育呀都係好片面，可能係一間屋，一塊地，咁但係整體喺點線面來講，荔枝窩係可以好完整咁呈現一個好立體嘅地方：由生態、生物多樣性、祖國都講嘅展示循環經濟、到一啲傳統文化、舊物等等，先至點解會咁多學校院校嚟呢度！荔枝窩喺香港來講，係一個好有條件做可持續發展嘅展示同教育嘅基地嚟嘅！因為正正係有齊咁多有利的條件，但係我哋點樣去發揮，點樣去整合，同埋令嗰個條件更加發揮到出嚟呢？

想知道Anna 嘅更多未來 #客家甜茶 計劃同埋Foo’s cafe 嘅難忘回憶？咁就要聽晒 第四集 #鄉村是| 鄉村事 五分鐘講鄉村故事！

【節錄內容】

🗨️天后點解會喺香港嘅客家村落咁受歡迎呢？

🎤其實因為天后係朝廷御封嘅一個稱號，如果可以信仰到朝廷認可嘅一個神明，嗰條村就可以話畀大家聽：「我係朝廷都認可嘅！」認受性會高啲。同埋天后主要係一個海上嘅神明，鄉民出海打魚，需要海上神明嘅保佑，咁先可以出去捕魚，又可以打到漁獲，安全返到屋企。（編按：天后，亦稱聖母，原名林默娘，為宋代福建人。清朝康熙年間，朝廷認為聖母／天妃保佑海軍平定台灣有功，冊封為「天后」。而香港／新安縣的不少客家村都是清初展界時，響應朝廷招墾而立村（本來清初遷界五十里也是為了收復台灣）。客家人作為「新移民」開墾土地，拜朝廷冊封的神明，似乎是理所當然的安身立命。）

🗨️聽講吉澳天后有個七國咁亂嘅傳說喎，究竟係點樣嘅呢？

簡單啲嘅版就係話，吉澳嘅天后點嚟呢？

➊第一個收集返嚟嘅口述歷史版本，話原本天后娘娘喺荔枝窩嘅，點知有一次打風，佢從荔枝窩飄咗嚟吉澳，吉澳村民就成立咗天后廟去供奉；但同一時間呢，荔枝窩嘅村民，其實都有嘗試用不同方法去攞返個天后嘅，但係就唔成功。最後，根據某位村民嘅講法，話係有個有地位嘅鄉村長老出嚟調停：「我哋摘聖杯問天后願唔願意去荔枝窩呀」，摘完之後，個結果話想留返喺吉澳。

➋第二個版本，係當地村民話其實天后娘娘係從鹽田飄過嚟。

➌後來我查書，有論文寫話位天后可能係喺一個叫暗徑嘅村，就飄咗去荔枝窩村先，然之後再飄去吉澳…呢個係第三個版本

➍第四個版本話，有個沙欄下（而家屬沙頭角嗰邊嘅村）嘅天后，係吉澳同暗徑嗰邊個天后嘅家姐！咁總之呢啲天后呢，就不斷咁飄來飄去，呢個天后同嗰個天后有啲關係… 其實遠至塔門嘅天后呢，亦都係同吉澳位天后，同埋鹽田嘅天后都係有姊妹關係嘅。

事緣塔門嗰邊有個天后廟，每十年都會打一次醮，佢哋會請吉澳同埋鹽田嘅天后過去，就一齊圍住個島巡一個圈嘅。咁點解要請另外兩邊地方嘅天后呢？因為相傳佢哋係三姊妹…!

所以島與島之間嘅天后，其實有好多親戚關係… (全文請見 天后傳說）

想知道Jackson 仲有咩分享？咁就要聽晒 第三集 #鄉村是| 鄉村事 五分鐘講鄉村故事！

【節錄內容】

🗨️香港中文大學喺過去幾年，分別喺梅子林、谷埔、榕樹凹等3條沙頭角一帶嘅鄉村做建築復育，Thomas你覺得其實佢哋每條村，喺環境上面有咩獨特之處呢？

🎤:慶春約七村中嘅梅子林，係喺半山嘅，隱蔽啲，係一條排村，前面兩排建築物，後面風水林，前面以前係斜落去嘅梯田啦，係好經典嘅山村格局。 谷埔呢，就大好多嘅，有個平埔同埋幾個山谷，最特別就係佢會有圍海造田，海灣圍住當時就田啦，而家就變咗濕地，所以谷埔有唔同嘅形態。 榕樹凹嘅特別之處呢，就係佢最隔涉嘅，同埋佢棄村之後有好多「樹屋」，有啲榕樹纏住啲屋，有啲其他樹呀，咁他們。

🗨️不如簡單介紹你哋喺呢三條村做嘅復育項目？ 🎤: 梅子林：第一期就係一個實驗性嘅建築修復，做一個示範，第二期呢，有個永續鄉村特別係老屋嘅修復。 谷埔：我哋個項目叫做遊谷探埔，第一期呢係一個多學科嘅保育教育同埋行動式研究，即係復修咗間屋等我哋啲老師同學可以入去嘅。第二期就喺田心村李氏大宅嗰度做復修，同埋一個綠色生活體驗嘅實踐。 榕樹凹：重塑榕樹凹故事，整一個實驗性嘅社區場地畀啲村民同埋啲遊人可以互動。

🗨️唔同村嘅做法有咩唔同？ 🎤: 其實梅子林老屋嗰度嘅夯土牆係最特別嘅，我哋做法其實都係尊重嗰度嘅建築先啦，同埋盡量研究佢嘅文化地景，即係建築、環境、一齊睇到佢個現狀之後就先至決定保留幾多，跟住加入新元素，即係實驗性嘅建築！咁做咗第一期呢，有咗信心，知道個環境係點，就做一個比較長，即係實淨啲嘅修復。 谷埔，喺五肚度修復嗰間屋呢，其實個狀態都唔錯，所以我哋只不過係輕微咁幫佢修補晒漏水油油呀所有門窗，等我哋嘅老師同學可以將佢變做一個研究嘅基地，同埋村民又可以返去。

🗨️項目當中有啲咩部份，你係覺得最滿意嘅？

🎤: 對於我哋來講，復育係一個過程嚟嘅啫，就算係建築修復，或者教學研究，都係一種手段去令到個過程可以開始到，發生到。 保育最緊要就係啲人可以返去，啲村民會返去，甚至乎有新嘅人好似我哋，或者其他遊人，有人就可以返去同啲村民再互動，咁先至去可以延續，因為延續呢個保育嘅過程呢，我諗先係最重要嘅。

想知道Thomas 更多對於 #客家 嘅見解？咁就要聽晒 第五集 #鄉村是| 鄉村事 五分鐘講鄉村故事！

【節錄內容】

🗨️吉澳以往係往來深圳鹽田同新界東北村落嘅中途站， 今日邀請吉姨同我哋分享船呢種工具， 對唔同年代嘅吉澳人有幾重要， 不如我哋由50年代之前講起？

🎤逢親嚟到島呢度啲人都有船嘅！但啲船呢，就唔係好似而家啲舢舨，係搖櫓嘅，有兩個人、有四個人（坐）。嗰啲船呢，係草船嚟，草船借箭嗰啲草船。以前搭船，有個人撐條船出去嘅，4點起身，撐到去沙頭角朝頭早6點。如果啲細路仔出世、肚痛呢，都係撐船，第一胎好危險，撐條船出去沙頭角診所架喇。跟住後來呢，有摩打船啦。開船嗰啲人叫：「我開船啦！」會用個響螺：「嘟嘟嘟嘟……我哋開船啦！要搭船呢就要快啲喇！」返嚟嘅就話:「船到喇船到喇…嗶嗶嗶嗶」吹著響螺殼，吹到好大聲㗎，呢個島啲人都聽到嘅。

我哋搭船去到沙頭角碼頭，兩邊都有屋，啲船到唔到岸嘅。若果水漲，啲人就畀錢腳伕，1毫子孭上岸。啲腳伕係沙頭角嘅人嚟，濕住隻腳，1毫子或者斗零1個人咁孭上岸。

以前我哋個碼頭唔喺東澳，而係喺榕樹頭，即係姻緣樹嗰度。嗰時香港政府做起咗個碼頭，碼頭就搬咗去而家嘅位置喇。

去到60年代，我哋有錢喇！嗰時我哋每日都有成十幾班船來回沙頭角嘅！去到80年代就剩返一條船（編按：吉澳天后宮福利渡的前身），有6（班）、或者9（班）咁來回，而家就4（班）囉 。以前人多嘛，我哋上下午班學生都有400人，夾埋900學生啦！

老人家退休囉七十幾歲，而家我船長七十幾歲啦，佢仲捱得幾多年？就算佢繼續做，咪頂多做多2年？咁2年之後呢？

🗨️我見而家都有由沙頭角開嘅運輸署嘅街渡，對你嚟講同以往福利渡有咩分別？ 🎤吉澳福利渡淨係為我哋吉澳而服務，半個鐘頭已經到咗我哋吉澳！ （沙頭角政府嗰班要一個鐘頭先到）係呀我哋半個鐘頭就到喇！

想知道吉姨想吉澳變成點？咁就要聽晒 第二集 #鄉村是| 鄉村事 五分鐘講鄉村故事！

1 最初，福利街渡是向天后宮招標，價高者得，可獨資經營，爲期一年，自負盈虧。初時用搖櫓，只可在東澳沙灘上船，抵達沙頭角之後，乘客還要涉水上岸。石喜章先生1952 年獲選為首屆漁民村代表，在任期間，與陸上村長共同商議把私營的吉澳街渡改爲天后宮福利街渡。初時不獲理民府批准，後來發生一件奇事：一日吉澳海面刮起大北風，街渡駛進避風塘停泊時，卻意外地被吹毀沉沒，無法修理，曾華及其夫人瑪莉因此放棄街渡經營權，理民府才肯把街渡批給天后宮經營，成爲至今仍然運作的福利街渡。【游運明、吉澳村公所值理會、旅歐吉澳同鄉會：《大鵬明珠吉澳: 滄海遺珠三百年》（2001）】

【節錄內容】

🗨️今年其中一個熱話就係沙頭角開放，不如請Frances同我哋簡單介紹吓?

🎤哈囉，大家好呀！沙頭角開放對於我嚟講係一件非常之開心嘅事！點解呢？因為之前一路都係唔開放旅遊嘅，如果你要入沙頭角，就一定要申請禁區紙。禁區紙係點樣呢？一係就做嘢，一係呢就喺到住，依家開放咗每一日有1000個名額，700個係畀旅行團嘅，有 300 個就可以自由行，入去可以自己申請啦！

🗨️咁你會帶朋友仔去邊度玩呢？

🎤我會去一啲，以前要搭過半鐘船，依家半個鐘就去到啲地方！例如會帶佢哋去荔枝窩村，梅子林村同埋蛤塘村，啲朋友覺得好特別，因為佢冇諗到：咦，原來呢度仲有人住嘅！有村民之餘，仲有人喺度返工，有啲後生仔耕田，仲保留咗馬騮架， 仲有新整嘅露營營地。以為荒廢咗嘅地方，原來都有咁多嘢玩嘅！

🎤我仲同佢哋講蛤塘村嘅故事，由村民發哥自己一個人同埋太太去復村！咁我講完呢個故事呢，佢哋覺得好勵志，好奇呀問發哥個歲數呀，咁我就話畀佢聽，其實發哥呢，依家已經七十幾歲㗎啦，咁佢見到發哥啲頭髮呢，仲係黑色嘅，又好健壯嘅，仲喺度用緊柴火炒餸整麵包，覺得好神奇！

🎤我又會帶佢哋落返去荔枝窩村，去村長群英姐嗰度食飯啦。群英姐嘅爹哋呀黃伯係年紀最大嘅村民， 103歲啊！一傾偈，咁佢哋就覺得哇，黃伯仲係思路好清晰！會講返起英女王探佢，又畀啲獎狀佢呀，呢啲故事...

想知道Frances 仲有咩有趣經歷同點睇鄉郊旅遊？咁就要聽晒 第一集 #鄉村是| 鄉村事 五分鐘講鄉村故事！