＃除了水上人，為何客家人都拜天后？
＃吉澳天后和 荔枝窩有甚麼淵源？
🎤嘉賓：Jackson，村里故事團隊成員， 對傳統習俗很有興趣
【節錄內容】
🗨️天后點解會喺香港嘅客家村落咁受歡迎呢？
🎤其實因為天后係朝廷御封嘅一個稱號，如果可以信仰到朝廷認可嘅一個神明，嗰條村就可以話畀大家聽：「我係朝廷都認可嘅！」認受性會高啲。同埋天后主要係一個海上嘅神明，鄉民出海打魚，需要海上神明嘅保佑，咁先可以出去捕魚，又可以打到漁獲，安全返到屋企。（編按：天后，亦稱聖母，原名林默娘，為宋代福建人。清朝康熙年間，朝廷認為聖母／天妃保佑海軍平定台灣有功，冊封為「天后」。而香港／新安縣的不少客家村都是清初展界時，響應朝廷招墾而立村（本來清初遷界五十里也是為了收復台灣）。客家人作為「新移民」開墾土地，拜朝廷冊封的神明，似乎是理所當然的安身立命。）
🗨️聽講吉澳天后有個七國咁亂嘅傳說喎，究竟係點樣嘅呢？
簡單啲嘅版就係話，吉澳嘅天后點嚟呢？
➊第一個收集返嚟嘅口述歷史版本，話原本天后娘娘喺荔枝窩嘅，點知有一次打風，佢從荔枝窩飄咗嚟吉澳，吉澳村民就成立咗天后廟去供奉；但同一時間呢，荔枝窩嘅村民，其實都有嘗試用不同方法去攞返個天后嘅，但係就唔成功。最後，根據某位村民嘅講法，話係有個有地位嘅鄉村長老出嚟調停：「我哋摘聖杯問天后願唔願意去荔枝窩呀」，摘完之後，個結果話想留返喺吉澳。
➋第二個版本，係當地村民話其實天后娘娘係從鹽田飄過嚟。
➌後來我查書，有論文寫話位天后可能係喺一個叫暗徑嘅村，就飄咗去荔枝窩村先，然之後再飄去吉澳…呢個係第三個版本
➍第四個版本話，有個沙欄下（而家屬沙頭角嗰邊嘅村）嘅天后，係吉澳同暗徑嗰邊個天后嘅家姐！咁總之呢啲天后呢，就不斷咁飄來飄去，呢個天后同嗰個天后有啲關係… 其實遠至塔門嘅天后呢，亦都係同吉澳位天后，同埋鹽田嘅天后都係有姊妹關係嘅。
事緣塔門嗰邊有個天后廟，每十年都會打一次醮，佢哋會請吉澳同埋鹽田嘅天后過去，就一齊圍住個島巡一個圈嘅。咁點解要請另外兩邊地方嘅天后呢？因為相傳佢哋係三姊妹…!
所以島與島之間嘅天后，其實有好多親戚關係… (全文請見 天后傳說）
想知道Jackson 仲有咩分享？咁就要聽晒 第三集 #鄉村是| 鄉村事 五分鐘講鄉村故事！